I Am the Djembe Excerpts >>

Dem Sey Mi a Racist

Dem sey mi a racist

Becaws mi walk mi walk an talk mi talk
becaws mi tell de hypocrite dem wey fi get aff
becaws mi cuss an chat de trute an offen'
de lackey an de slackness wey dem defen'.

Dem sey mi a racist

Becaws mi big up black an hail Africa
an tell de story of Jamaica
becaws mi talk bout de rape and mutilation
an de suffering wey tek place pon de plantation

Dem sey mi a racist

Becaws mi talk bout de law wey dem institute
wey rob Africa a it productive yout
mi criticise de way 'ow fi nuff century dem teach
black negation inna de sermon wey dem preach

Dem sey mi a racist

Mi tell de pickney dem fi proudly defen'
de cultural heritage, becaws a fi dem
mi chant nuff verse bout racial pride
Rodney an Garvey a fi mi guide

So dem sey mi a racist

Dem nuh waah mi talk bout de theory dem pen
Sambo an Quashie a simple-minded men
de belief wey dem plant sey wi inferior to dem
did base pon de view sey wi race condemn

But a mi dem sey a racist

Dem nuh waah mi talk bout de discrimination
dem claim sey dat happ'n to past generation
de branding an torture dem claim wuz a fad
an de wound dem heal so it wuz'n dat bad

So dem sey mi a racist

Dem claim dem uncomfortable wen mi shout, freedom!
it remind dem a wen wi play de drum
far some regret sey emancipation come
it mus' neva talk sey, White man done

So dem sey mi a racist

Mi gi praises fi dis lan' in de sun
dem talk bout heritage a no more fun
dem vex wen mi talk bout complexion
skin colour dem claim ongle cause confusion

So dem sey mi a racist

Far mi bawl out loud bout de tings wey mi si
dem nuh gi respect to Black man like mi
dem look pon mi skin an form a plan
mi too damn black fi be a good man

But a mi dem sey a racist

Mi chat mi Patois an de ole a dem frown
an claim sey dem nuh like 'ow de language sound
it brawling, far it come deep from de gut
it remind dem a wi roots wey de slave trade cut

But a mi dem sey a racist

Becaws mi sey Moses wuz a educated Black man
dem sey idiat like mi dem caan stan'
mi sey Jesus walk yah as a Black man
dem sey racist like me a corrupt God plan

Dem sey mi a racist

Mi come unda nuff attack
becaws mi sey de prophet dem did Black
de Lawd dem claim coulda neva mad
far black inna de Bible mean tings wey bad

But a mi dem sey a racist

Mi nuh mind dose wey have Northern complexion
mi expec' dem fi ave a negative reaction
but it sad wen people wid African connection
sey black pride ongle cause racial confusion

Dem sey mi a racist

Nuff Black claim a dem mi attack
black acceptance and pride dem badly lack
dem shame, soh dem sey mi soun' like racist
dem plot gainst mi an call mi a riotist

De wicked dem call mi a racist

Dem fraid fi git up an tek a stand
a gwaan like dem fadda wuz'n a Black man
dem slanda mi as much as dem can
becaws mi sey wi suffa unda de English man

De coward dem call mi a racist

Becaws dem reject Africa
dem nuh know de history an wah wi suffa
dem 'ug up de culture of de slave master
tink dat a carry dem goh a heaven faster

De fool dem sey mi a racist

Africa! De blackness, de beat a de drum
black skin, race consciousness, positveness come
Kumina, Tambo, Bruckins an Burru
believe it or not, a part a yuh!

But de hypocrite dem hide dem faces...
an claim sey mi a racist.

<<page one of the Bareface Pickney excerpts>>

Home | Links | Site Map | Contact Us

^
Top